因為風水嘅原因，我哋打算將煮食爐同鋅盤對掉位置（第一水同火分開啲，第二唔洗一入廚房就係個爐頭，仲要對住廳）。
師父上星期五打嚟提我哋要搵煤氣師父上嚟夾位～（好彩有師父提～ Y(＾_＾)Y）
因為約咗裝修師父星期一夾水電位，咁就約埋煤氣師父同一日嚟～
星期日朝早瞓醒突然間諗，如果要夾位，係咪要搵埋寬頻公司呢？好彩，男友一早已經諗好咗揀邊間網絡商，唔洗左睇右睇～
去咗寬頻公司約時間，都係尋日（星期一）上嚟，約親寬頻商都谷氣，因為次次都唔準時 -_-#，再三提佢要 7 點到……
尋日去到，裝修師父原來喺度度緊平水，等咗陣煤氣師父嚟，果然管理處個 Doorphone 係未整好嘅，之前管理處又 Hea 我，都係要打去再安排人嚟整…… ⊙_⊙
煤氣師父真係好好人（都係上次嚟甩熱水爐嗰位），佢同裝修師父夾好咗位。
裝修師父之前話有條排氣喉係煤氣洗衣機用嘅，不過唔知係咪同隔離單位共用，問埋煤氣師父，Confirm 可以拆走，咁就好嘞，冇咗呢條喉走抽油煙機喉好行好多～ L(^o^)」
原本約師父星期一係想連埋男友一齊同師父講啲水電位，同等師父同男友兩個傾個冷氣機同咸水掣嘅，點知男友臨時公司有事收唔切工，唯有我同師父夾住位先…… ←_←
Mark 晒啲相對簡單嘅位，到裝電視嗰邊嘅牆身…… 道牆本身唔闊，喺低位有一個 Lan 位、一個孖蘇同一個電視位，我哋想做條 2"x3" 暗槽，同師父對咗位，師父突然話做唔到，因為開咗箱仔見到個孖蘇係喺天花由電箱 Drop 落黎再行下面去對面嘅孖蘇，仲要喺牆嘅正中間…… 後來師父提議加返一個單蘇喺電視個位（即係喺原本燈喉中間抽返出嚟），再喺低位另一邊做多個孖蘇，咁原本燈喉個位可以做返槽…… 但係咁樣無啦啦又等於要做多 2.5 個電位…… 為咗男友可以打機我可以睇電視就咁做咗 4 個電位…… T_T
夾埋晒所有嘢，寬頻師父都係唔見人…… 原本約 7 點，7 點半打嚟話要 8 點，咁我唯有去朋友屋企痴住餐先啦…… 最後要成 22:45 先打嚟話就到…… 真係激到暈 ヽ(`Д´)ﾉ 係咪間間寬頻公司都係咁咖？？？ 超嬲……
尋晚 Mark 晒位，今日水電師父就進場嘞……
 |
| 廳鞋櫃留燈位 |
 |
| 加電視槽加插蘇改位 |
 |
| 廳燈槽留燈位 |
 |
| 書房窗枱加孖蘇同 Lan 頭 |
 |
| 書房留櫃燈位 |
 |
| 睡房窗台加 2 way 燈掣位 |
 |
| 將原本放喺電視嗰邊牆嘅燈掣改過廚房對出 加飾燈控制同孖蘇 |
 |
| 改熱水控制 抽油煙機個蘇都改緊，冇影到相 |
另外，屋苑管理處真係好麻煩，搭個棚要填申請表話換冷氣，仲要業主自己去搞，又要填型號、尺寸、重量、呢樣嗰樣，師父去又唔得，都傻傻哋嘅，我哋都簽咗受權間裝修公司做裝修，因咩解究裝修公司負責人唔可以簽？硬化制度！(￣Д￣)ﾉ
嚟緊要決定究竟係裝窗口機定分體機，同埋要揀門嘞～
沒有留言:
張貼留言