♡ 屠殺小強大行動 ♡ 第一回戰果 ♡

今日放工一支箭咁標去新居睇尋日嘅成果～

上去之前追加咗啲裝備，有另一隻牌子雷x小強炸彈（尋日用殺它x）、膠枱布（原本諗住用黎封冷氣不過最後冇封到）、膠櫈（必需，因為我完全唔夠高睇櫃頂情況）、布、手套、口罩。

因為男友唔得閒，所以陪唔到我上去新居，咁我就首先搵埋住對面座嘅朋友幫我 Keep 住啲褸呀、帽呀、手袋呢類行裝，喺單位外走廊等我。

帶住手套口罩，即刻用 9 秒 9 衝入單位開晒所有窗，跟住閃人。因為尋日用完小強炸彈，要先散味起碼半個鐘至一個鐘～

咁等埋朋友嘅老公一齊食完個飯就上去驗收成果嘞～

首先由廚房開始睇，其實都預咗會有超級多嘅小強，應該係「正常細 Size」嘅德國小強，不過唔知係咪因為我哋尋晚封晒全間屋啲小強可以走佬嘅地方，包括抽氣扇、去水位同 overflow 位，經過第一次放小強炸彈之後，戰績係：
大量中強同小強全部陳屍廚房窗枱位
超大量加細強陳屍喺洗手盆
少量小強喺廚櫃同地下
（居然）有少量小強喺雪櫃裡面！

應該係啲中小細強想經窗或抽氣扇同埋去水口潛逃～全個廚房係重災區，有幾十隻已經歸西……

其餘地方唔及廚房多，但都幾多下，因為間屋都吉吉地，直接用掃把一之次過掃晒（其實都幾屍橫遍野），完全冇諗過要數有幾多……

不過敗筆係，唔記得封冷氣機！但係因為三部分體機都壞壞哋（或者叫做壞晒），我哋都打算換過晒咖啦。今日走嘅時候依然係冇封到冷氣機出風口，因為我唔夠高，唯有過兩日睇男友肯唔肯理我啦～

掃走晒啲屍骸，請朋友老公幫手拉個什物櫃出黎…… 出事！

櫃背冇小強，但有大量強蛋，櫃遮住咗嘅牆身同木地腳線裂口位都有強蛋…… 其實真係唔知小強炸彈對強蛋有冇用，唯有小心翼翼咁清晒佢地出黎，用膠袋包好綁緊，再掉去垃圾房。

我決定，我絕對唔會要啲木地腳線！木，真係小強最愛住嘅地方，仲要地腳線一個唔覺意裂咗，咁佢哋就真係有個五星級的家，我唔要再 Suffer 多次強滿為患咖啦～

個什物櫃呢，因為太大太重又實木嘅關係，唯有放喺廳中心。唔好貼牆身，啲大中小強應該冇地方匿埋啩。

臨走前用x露消毒咗下次會再用嘅手套，再放多次小強炸彈（都係打孖兩隻）！

殺呀～

暫時睇，炸彈效果幾得，起碼冇見到活生生嘅大中小強，係強蛋比較麻煩……