♡ 屠殺小強大行動 ♡ 小強巢穴發現記 ♡

話說婚後打算住嘅新居已經買咗一段時間，記得初初收樓未放租時久唔久有上去呆坐半晚，嗰時都有見過吉嘅廳有小強行 Cat Walk，又見過有小強喺去水位走出黎 。

不過因為上手業主啱啱搬走，以為係因為搬傢俬所以有小強，見一隻殺一隻就算，冇幾耐就租咗出去嘞。

直到租客喺我哋仲諗緊究竟農曆新年前通知佢收樓好吖定農曆年後好吖嘅時候，打黎話要搬，咁我哋加埋爸爸就前晚上返去收樓嘞。

其實呢位租客人好好，等緊兩個男人 Check 嘢嘅時候我同佢傾計，佢話「如果你收返黎自住，咁你真係要留意吓，呢度好多小強」……

聽完，雖然阿爸叫我唔好擔心話小強跟人嘅，我都已經即時決定 2015 年元旦要處理咗啲小強先，同男友講，佢話「都打算裝修啦，裝修先搞啦……」

我唔理，我唔理  ，同男友再傾，決定都係元旦上去放小強炸彈，唔要啲小強喺度橫行！

今日五點前，我哋買晒一大堆嘢，有小強炸彈 x2、小強藥餌 x8、水桶、漂白水、手套、紙巾、掃把，立心有佢哋冇我！

上到去發現個租客仲留咗呢啲武器俾我哋，其實呢位租客真係算好乾淨，因為全屋都俾佢貼晒啲小強藥餌，仲有威x先生清潔劑 x2 、（都係）漂白水、塵掃、大圈膠紙、垃圾袋。

雖然一開始男友話 Hea 住清潔，不過佢好好知我有啲古怪強迫症，自己自動波去咗開廁所嘅假天花檢查。

廁所係交樓標準，有潔具同一個鏡櫃加抽氣扇，全部都好殘啦，冇法啦，租俾人冇租客會當自己樓咁清潔……

咁我就自己喺廚房清晒啲租客留低嘅少量物品，收拾啲小強遺骸，同掃一掃啲櫃呀哋呀咁。

不過因為都係原裝交樓標準（樓齡大約十年多啲），有啲廚房櫃桶係俾個洗衣機頂住抽唔到出黎清嘅。個廚房都要拆過做過晒咖啦…

一路都相安冇事咁係咁依清咗一個喺廚房對出嘅什物櫃同主人房嘅大衣櫃（上手業主留低嘅），廳冇嘢，得個上咗牆嘅架仔（都係上手業主嘅）。

清清吓嘅時候，男友話廁所假天花嘅情況比預期好，冇小強冇小強蛋冇小強便便，喉同渠都似乎冇事。

好嘞，咁男友繼續去廚房拆開啲假天花啦，我就去細房繼續掃塵… 差唔多完工都唔見有小強遺骸以外嘅小強蹤影。

男友開晒啲廚房假天花，好靚仔吓喎，都係冇小強冇小強蛋同小強便便。

咁我再去執吓個廁所，同去啲去水位倒 1：50 漂白水啦… 點知……

男友喺細房嗌出黎話搵到！

細房有個上手業主留嘅窗台櫃同牆架，我哋發現呢個窗台櫃比多拉 A 夢個法寶袋更勁……

點勁法？

呢個櫃係左右趟嘅，分左右兩隔，每次趟開道櫃門 ，個櫃入面都會出現幾隻活生生嘅小強，殺完左邊，趟開右邊，右邊會有幾隻，殺完右邊，趟開左邊，左邊又會有幾隻，仲要一次比一次大隻，好似會變出黎咁。

原來啲趟櫃嘅路軌會收埋好多小強！

殺呀殺呀～慶幸我唔怕小強。

人哋話見到小強唔好飛拖鞋，可能會令佢哋肚入面嘅蟲卵飛出黎，我哋用威x先生噴，盡量令佢行得慢啲，再用紙巾（當然帶手套啦～）㩒死佢…

好似冇咩小強嘞，忍唔住，都係夾手夾腳將個實木櫃拎出黎。

墊晒垃圾袋（因為冇拎報紙），一拎個櫃出黎望真啲，真係兩個人都忍唔住鬧咗出黎：

XYZ*XO#%…… 點解個櫃背可以有咁多中強同小強同強蛋咖！！！

唔敢殺，怕打草驚蛇，怕搞到啲小強四圍走……

個櫃係實木，好重…… 又唔可以埋身，因為啲小強唔知被殺晒未，仲有處理唔到嘅強蛋…… 仲要，由單位去垃圾站條路又因為管理處封，我哋唔知點行……

幾經辛苦，兩個人夾手夾腳將個小強落地生根嘅櫃掉咗去屋苑掉大件傢俬嘅垃圾站。

終於，搞掂個最細嘅櫃，忍唔住，都係想拉開個衣櫃離牆少少望吓，男友唔太想但又冇我乎，唯有照做…… 咦，呢個櫃居然冇事喎。

中間梗係又發現一兩隻小強啦，都唔知係咪原本喺個窗台櫃嘅漏網之魚。

個什物櫃我都想拉開咖，不過因為俾嘢頂住拉唔到……

最後，我哋封晒啲去水位，關咗廚房電總掣（冇嘢喺雪櫃，熄咗佢慳電啲），放埋兩個小強炸彈，走嘅時候已經八點幾。