♡ 屠殺小強大行動 ♡ 大消毒 ♡

為免俾男友話我專做無聊嘢 ，明明啲嘢都唔要仲要清潔消毒，決定賣甩佢自己上新屋大消毒 ！

放完第一次小強炸彈，屍橫遍野；放完第二次小強炸彈，得一兩隻被 KO。

前日發現廚房假天花有三幾隻小強遺骸，強迫症又發作…

17:30 上到去開晒啲窗，落返樓諗住買武器，原本打算再炸多次，不過買唔到第三個牌子，唯有聽日先～

18:15 再返上去，搞到啱啱 23:00，超後悔唔叫埋男友，點解我會咁傻一個人執屋？

今日做咗超多嘢，唔係攰到剩返半條命咁簡單，完全係拎咗我條老命咁…

做返個記錄睇吓幾時有機會領吓功先～

【玄關】
係咁咦抹咗成間屋嘅門窗，連門框窗框
大門超誇張，門鉸嗰邊係全部都一舊舊塵堆喺度
掃晒地下啲小強屍體同陳年舊塵

【客飯廳】
用滴露抹咗個窗台
用滴露抹咗上手業主剩返嘅什物櫃、牆架
雖然都掉，不過太重我哋自己掉唔到，但又明知之前有好多小強同卵，喺未掉之前唔消毒唔聚財

【主人房】
用滴露抹咗主人房個窗台
開咗個冷氣維修位嘅百頁窗，掃咗啲可能有十年嘅塵再用滴露抹
用滴露抹咗上手業主剩返嘅大衣櫃
雖然都掉，不過太重我哋自己掉唔到，但又明知之前有好多小強同卵，喺未掉之前唔消毒唔聚財

【客房】
用滴露抹咗曾經有好多小強伏屍過嘅窗台
開咗個冷氣維修位嘅百頁窗，掃咗啲可能有十年嘅塵再用滴露抹
用滴露抹咗個牆架

【廚房】
將整個雪櫃啲層隔拆晒出黎，裡裡外外咁抹晒所有小強屍體同食物殘留
拆晒啲假天花落黎，掉晒啲小強屍體，用滴露抹，連大部分天花骨都抹埋
假天花用膠枱布包咗放咗喺地下
徹底清潔咗個微波爐同係咁咦抹咗個洗衣機
居然仲有上手租客女友個 Bra 喺裡面
用威x先生廚房清潔劑去咗大部分陳年油積
抽油煙機太恐怖，兩個租客應該從來冇洗過，個油隔真係搞唔掂，拎膠袋包住，等 Mr.W 發落
用滴露抹晒成組廚櫃
頂到底嘅三面櫃
廚房抽氣扇真係冇眼睇，反正之前 Mr.W 用膠紙封咗，睇佢唔到睇佢唔到…
清晒上手租客唔知擺咗幾耐嘅藥餌
有啲藥餌仲發埋霉添……

【廁所】
將廁所拆得嘅假天花拆埋落黎消毒
用滴露抹晒成個廁所，連櫃連潔具
用漂白水沖埋未封嘅兩個去水口
廁所洗手盆同浴缸去水口
企圖用漂白水去咗個馬桶啲積，唔得，之後再用潔x得嘗試清咗佢，又唔得
用布抹但唔成功，最終用掃把隊上去，清咗大部分廁所抽氣扇成尺厚嘅塵
都唔知呢個單位第一手業主兩代租客十年黎有冇人曾經清理過
用滴露洗晒啲手套同掃把同垃圾鏟同布之類，乾咗之後可以再用
冇理由裝修好之前每次清潔每次都買過啲新嘅

聞咗四個幾五個鐘滴露同漂白水，依家好鬼暈，又好鬼攰……下次都係拎個豬咀口罩安全啲……

經此兩役，原居民小強應該冇得留低，依家係怕小強新移民，聽日收工要再放炸彈，放夠炸彈之後要再放藥餌……

♡ 屠殺小強大行動 ♡ 第一回戰果 ♡

今日放工一支箭咁標去新居睇尋日嘅成果～

上去之前追加咗啲裝備，有另一隻牌子雷x小強炸彈（尋日用殺它x）、膠枱布（原本諗住用黎封冷氣不過最後冇封到）、膠櫈（必需，因為我完全唔夠高睇櫃頂情況）、布、手套、口罩。

因為男友唔得閒，所以陪唔到我上去新居，咁我就首先搵埋住對面座嘅朋友幫我 Keep 住啲褸呀、帽呀、手袋呢類行裝，喺單位外走廊等我。

帶住手套口罩，即刻用 9 秒 9 衝入單位開晒所有窗，跟住閃人。因為尋日用完小強炸彈，要先散味起碼半個鐘至一個鐘～

咁等埋朋友嘅老公一齊食完個飯就上去驗收成果嘞～

首先由廚房開始睇，其實都預咗會有超級多嘅小強，應該係「正常細 Size」嘅德國小強，不過唔知係咪因為我哋尋晚封晒全間屋啲小強可以走佬嘅地方，包括抽氣扇、去水位同 overflow 位，經過第一次放小強炸彈之後，戰績係：
大量中強同小強全部陳屍廚房窗枱位
超大量加細強陳屍喺洗手盆
少量小強喺廚櫃同地下
（居然）有少量小強喺雪櫃裡面！

應該係啲中小細強想經窗或抽氣扇同埋去水口潛逃～全個廚房係重災區，有幾十隻已經歸西……

其餘地方唔及廚房多，但都幾多下，因為間屋都吉吉地，直接用掃把一之次過掃晒（其實都幾屍橫遍野），完全冇諗過要數有幾多……

不過敗筆係，唔記得封冷氣機！但係因為三部分體機都壞壞哋（或者叫做壞晒），我哋都打算換過晒咖啦。今日走嘅時候依然係冇封到冷氣機出風口，因為我唔夠高，唯有過兩日睇男友肯唔肯理我啦～

掃走晒啲屍骸，請朋友老公幫手拉個什物櫃出黎…… 出事！

櫃背冇小強，但有大量強蛋，櫃遮住咗嘅牆身同木地腳線裂口位都有強蛋…… 其實真係唔知小強炸彈對強蛋有冇用，唯有小心翼翼咁清晒佢地出黎，用膠袋包好綁緊，再掉去垃圾房。

我決定，我絕對唔會要啲木地腳線！木，真係小強最愛住嘅地方，仲要地腳線一個唔覺意裂咗，咁佢哋就真係有個五星級的家，我唔要再 Suffer 多次強滿為患咖啦～

個什物櫃呢，因為太大太重又實木嘅關係，唯有放喺廳中心。唔好貼牆身，啲大中小強應該冇地方匿埋啩。

臨走前用x露消毒咗下次會再用嘅手套，再放多次小強炸彈（都係打孖兩隻）！

殺呀～

暫時睇，炸彈效果幾得，起碼冇見到活生生嘅大中小強，係強蛋比較麻煩……

♡ 屠殺小強大行動 ♡ 小強巢穴發現記 ♡

話說婚後打算住嘅新居已經買咗一段時間，記得初初收樓未放租時久唔久有上去呆坐半晚，嗰時都有見過吉嘅廳有小強行 Cat Walk，又見過有小強喺去水位走出黎 。

不過因為上手業主啱啱搬走，以為係因為搬傢俬所以有小強，見一隻殺一隻就算，冇幾耐就租咗出去嘞。

直到租客喺我哋仲諗緊究竟農曆新年前通知佢收樓好吖定農曆年後好吖嘅時候，打黎話要搬，咁我哋加埋爸爸就前晚上返去收樓嘞。

其實呢位租客人好好，等緊兩個男人 Check 嘢嘅時候我同佢傾計，佢話「如果你收返黎自住，咁你真係要留意吓，呢度好多小強」……

聽完，雖然阿爸叫我唔好擔心話小強跟人嘅，我都已經即時決定 2015 年元旦要處理咗啲小強先，同男友講，佢話「都打算裝修啦，裝修先搞啦……」

我唔理，我唔理  ，同男友再傾，決定都係元旦上去放小強炸彈，唔要啲小強喺度橫行！

今日五點前，我哋買晒一大堆嘢，有小強炸彈 x2、小強藥餌 x8、水桶、漂白水、手套、紙巾、掃把，立心有佢哋冇我！

上到去發現個租客仲留咗呢啲武器俾我哋，其實呢位租客真係算好乾淨，因為全屋都俾佢貼晒啲小強藥餌，仲有威x先生清潔劑 x2 、（都係）漂白水、塵掃、大圈膠紙、垃圾袋。

雖然一開始男友話 Hea 住清潔，不過佢好好知我有啲古怪強迫症，自己自動波去咗開廁所嘅假天花檢查。

廁所係交樓標準，有潔具同一個鏡櫃加抽氣扇，全部都好殘啦，冇法啦，租俾人冇租客會當自己樓咁清潔……

咁我就自己喺廚房清晒啲租客留低嘅少量物品，收拾啲小強遺骸，同掃一掃啲櫃呀哋呀咁。

不過因為都係原裝交樓標準（樓齡大約十年多啲），有啲廚房櫃桶係俾個洗衣機頂住抽唔到出黎清嘅。個廚房都要拆過做過晒咖啦…

一路都相安冇事咁係咁依清咗一個喺廚房對出嘅什物櫃同主人房嘅大衣櫃（上手業主留低嘅），廳冇嘢，得個上咗牆嘅架仔（都係上手業主嘅）。

清清吓嘅時候，男友話廁所假天花嘅情況比預期好，冇小強冇小強蛋冇小強便便，喉同渠都似乎冇事。

好嘞，咁男友繼續去廚房拆開啲假天花啦，我就去細房繼續掃塵… 差唔多完工都唔見有小強遺骸以外嘅小強蹤影。

男友開晒啲廚房假天花，好靚仔吓喎，都係冇小強冇小強蛋同小強便便。

咁我再去執吓個廁所，同去啲去水位倒 1：50 漂白水啦… 點知……

男友喺細房嗌出黎話搵到！

細房有個上手業主留嘅窗台櫃同牆架，我哋發現呢個窗台櫃比多拉 A 夢個法寶袋更勁……

點勁法？

呢個櫃係左右趟嘅，分左右兩隔，每次趟開道櫃門 ，個櫃入面都會出現幾隻活生生嘅小強，殺完左邊，趟開右邊，右邊會有幾隻，殺完右邊，趟開左邊，左邊又會有幾隻，仲要一次比一次大隻，好似會變出黎咁。

原來啲趟櫃嘅路軌會收埋好多小強！

殺呀殺呀～慶幸我唔怕小強。

人哋話見到小強唔好飛拖鞋，可能會令佢哋肚入面嘅蟲卵飛出黎，我哋用威x先生噴，盡量令佢行得慢啲，再用紙巾（當然帶手套啦～）㩒死佢…

好似冇咩小強嘞，忍唔住，都係夾手夾腳將個實木櫃拎出黎。

墊晒垃圾袋（因為冇拎報紙），一拎個櫃出黎望真啲，真係兩個人都忍唔住鬧咗出黎：

XYZ*XO#%…… 點解個櫃背可以有咁多中強同小強同強蛋咖！！！

唔敢殺，怕打草驚蛇，怕搞到啲小強四圍走……

個櫃係實木，好重…… 又唔可以埋身，因為啲小強唔知被殺晒未，仲有處理唔到嘅強蛋…… 仲要，由單位去垃圾站條路又因為管理處封，我哋唔知點行……

幾經辛苦，兩個人夾手夾腳將個小強落地生根嘅櫃掉咗去屋苑掉大件傢俬嘅垃圾站。

終於，搞掂個最細嘅櫃，忍唔住，都係想拉開個衣櫃離牆少少望吓，男友唔太想但又冇我乎，唯有照做…… 咦，呢個櫃居然冇事喎。

中間梗係又發現一兩隻小強啦，都唔知係咪原本喺個窗台櫃嘅漏網之魚。

個什物櫃我都想拉開咖，不過因為俾嘢頂住拉唔到……

最後，我哋封晒啲去水位，關咗廚房電總掣（冇嘢喺雪櫃，熄咗佢慳電啲），放埋兩個小強炸彈，走嘅時候已經八點幾。