♡ 第一部電器入手 ♡ 客飯廳分體機 ♡

一開始已經知全屋冷氣都係壞咖啦…… 咁如果三部都用分體機好似都幾重皮，既然反正我又好怕分體機要維修，咁折衝啲決定：

客飯廳：好啲嘅分體機
書房：未諗掂用 3/4 定 1 定 1 1/2 匹窗口機
睡房：同書房一樣

問過朋友，話其實用匹半應該都夠，但係因為間屋西斜，話價錢如果唔係相距太遠就用兩匹喎。

咁啱得咁橋，有朋友屋企要換冷氣，唔知用咩渠道搵到大x筍貨（淨機，唔包安裝），應該都接近 dealer 價，問我啱唔啱喎～梗係即刻 Confirm 要一部兩匹淨冷啦～

幫手買嘅朋友問點解唔買冷暖，唔知係咪偏見呢，硬係覺得好似淨冷會㩒啲…… 

依家都仲未定到師父，都唔知叫間鋪幾時送貨好…… 希望師父快啲出世啦～

♡ 度尺報價 ♡ 睇價單 ♡

因為爸爸介紹嘅師父冇俾明細，所以直接 Out 咗，只係比較咗另外兩位師父～

暫時睇落兩個師父價錢差唔多，包嘅大項一樣，細項細節有啲啲唔同，兩個都有啲嘢冇寫，唔知佢包定唔包……

既然係咁，都係問清楚啲啲，再搵師父睇手工，希望兩個星期內有定案啦…… 其實我想一星期內，但都係睇吓快唔快到啦，好驚裝修唔切…… (>﹏<)

♡ 度尺報價 ♡ Red 哥介紹嘅師父 ♡

都係我哋兩個見師父，感覺都 OK 嘅，三個師父裡面得佢一個有真係度尺，因為佢會報埋部分傢俬俾我哋。

問嘅嘢同之前貓姐介紹嘅師父差唔多，答案都係正常同有紋有路，傾、睇、度咗大約 1 個鐘。

師父嘅額外 / 不同建議有呢啲：

• 同爸爸介紹嘅師父一樣，唔建議門同門框油手掃漆，怕反起（三個師父兩個咁講，似乎要小心啲 (︶︹︺)）
• 新意見，打磨翻新廳房木地板可能有問題，因為怕係環保地板，一磨就穿（咁大件事？！o_O 要慎重考慮吓）
• 同貓姐介紹嘅師父睇法唔同，依家個煤氣熱水爐係靚嘢（唔係儲水式），如果搵煤氣公司 Check 完冇問題唔好換（問吓煤氣公司先，如果係真咁唔換嘞，慳啲好…… (^_^;)）

原本師父應承我哋上門度尺（19/4）第三日俾價單，最後我哋等了又等催了又催，今日（27/4）終於有嘞，不過都算係三份裡面最詳細嘅。

雖然師父係遲啲俾價單，但因為佢要報嘅嘢多啲，睇完之後都覺得可以考慮。

♡ 度尺報價 ♡ 貓姐介紹嘅師父 ♡

今次得我哋同師父傾， 感覺上幾可靠，但師父話未必有期做。

同埋師父都好似老實，我哋都知裝修老一輩做法興收茶錢，即係裝修師父帶你去揀料，間鋪會俾啲折頭你，同時都會俾啲茶錢師父，都唔係啲咩秘密，不過由佢把口講出嚟，感覺上老實啲，有啲啲分加吓。

比起爸爸介紹嘅師父，我哋都問咗幾多其他嘢，答我哋嘅嘢同俾嘅建議有啲大同小異，不過答起上嚟有紋有路啲（雖然我哋都唔太知有冇答錯我哋啦……）

都係冇實際拎把尺出嚟度，大約傾同睇咗 1 個鐘。

師父嘅額外 / 不同建議有呢啲：

• 最好換咗廚廁嘅來去水喉，因為怕到時完工 Touch Wood 有咩事，其實邊個有責任好難講，通常都係業主硬食（都係嘅，換咗一勞永逸）
• 門可以用手掃漆幫我哋翻新（有好有唔好，唔知點揀好 (^_^;)）
• 煤氣熱水爐可以換，反正都用咗 10 年，可以幫我哋同煤氣公司夾，同埋一定要問煤氣公司可以用咩爐，如唔換就要搵煤氣公司嚟 Check 吓好啲（咁…… 打電話去問啦……）
• 除咗廚房地櫃、吊櫃、廁所洗面盆櫃、鏡櫃，其他櫃叫我哋自己去買或訂，會平啲，反正佢都係搵傢俬鋪做（我呢個懶人諗起要自己搞有啲頭暈…… @_@）
• 廳房地板鋪過定打磨翻新都可以

師父 14/4 上門「度尺」，17/4 （今日）俾咗 Breakdown 報價俾我哋。

度完尺見完，睇完價單，覺得呢個師父可以考慮。

♡ 度尺報價 ♡ 爸爸搵嘅師父 ♡

尋日，爸爸好熱心咁陪埋我哋去見師父。

因為爸爸喺度，所以成個度尺過程似吹水大會多啲，好似有啲無奈…… -_-#

成個度尺工序歷時 45 分鐘度，師父係無拎過把尺出嚟，唔知係咪靠經驗估個價俾我哋……

師父嘅建議有呢啲：

• 打磨翻新現有木地板同地腳線，慳返啲
• 木門油手掃漆怕天拿水一上會「嗱」反啲木，建議門同門框都係唔好搞，佢會幫我哋油一層類似光油嘅嘢（不過唔係光油，唔記得咗叫咩 ⊙_⊙）
• 我哋想用麻石做廚櫃面，唔用人造石，師父話都好，可以考慮煤氣煮食爐隔離牆身鋪多一塊（通常啲人用不銹鋼或玻璃），我覺得都唔錯 (￣∇￣)
• 地台床做唔做分別都唔太大，唔做慳好多（我都明，因為地方太細喇，而做地台床都幾貴吓…… =皿=）
• 睡房對出個走廊位做唔做天花櫃都係分別唔大（雖然係細，但係如果價錢平，都可以考慮嘅）
• 廚房門最好唔好搞，如果拆咗或者換唔係防火門，第二時想賣樓俾買家話冇防火門壓價，咁就唔抵（其實我哋冇打算賣呀～諗住有排住咖～不過我比較 Concern 嘅係安全同埋保險）

爸爸額外建議有呢啲：

• 原本廚房嘅窗有個窗台仔，用麻石鋪咗佢，做類似層板咁延長到鋅盤對上，可以用嚟放吓嘢，例如啱啱洗完嘅杯（果然係老爸嘅 Design，同我依家屋企廚房一樣 ( ´▽` )ﾉ）
• 原先第一手業主嘅廚房係建築交樓標準嚟嘅，一出到廚房右手面係雪櫃、洗衣機、微波爐嗰啲，左手面係就咁一個地櫃櫃面（即係冇吊櫃），做返個櫃或者架，將啲微波爐、（超細型）焗爐放過嗰度，歸一啲（都係嘅，但係開住道廚房門會遮咗，唉，真係諗唔掂道廚房門 T_T）
• 就算唔做呢個櫃或者架，最好都加返一兩個電掣喺呢個位，第二時放電器過去都冇問題（好彩老爸提，唔講都冇諗起添 Y(＾_＾)Y）

上門「度尺」嘅第二日，師父覆咗個 Lump Sum 價，我哋問佢拎 Breakdown，佢話全包（除咗櫃），我哋繼續問 Breakdown 細項，想要返個 List，但佢之後已經冇咗影……

感覺上好似好冇安全感咁，都係唔考慮師父 A 嘞，費事佢所謂嘅全包原來唔係我哋以為嘅全包……

♡ 度尺報價 ♡ 前篇 ♡

呢兩個星期開始感覺到，原來結婚同裝修一齊搞…… 係會……忙到…… 暈咖！！！ヽ(`Д´)ﾉ

話說收返間屋已經好耐，一路都 Hea 咗喺度，早兩個星期至搵師父上嚟度尺報價…… (^_^;)

間屋幾大？

新鴻基二手樓
樓齡 10 年
實用面積大約 430 呎
兩房兩廳一廚一廁
都變唔出咩間隔啦～
 ╮(╯▽╰)╭

想執啲咩都係睇住 Budget 做人，都係叫住師父俾個報價嚟睇咗先再決定做唔做……

-_-b 結婚裝修真係陰吓陰吓洗唔少錢……

想搞啲咩？

Ａ）拆嘢、掉嘢

原有建材、傢俬、電器，包括：

• 兩房兩廳木地板、木地腳線
• 廚房地磚、牆瓦、假天花
• 廁所地磚、牆瓦、假天花、馬桶、浴缸
• 兩個吊櫃、一個什物櫃、一個衣櫃
• 一個廚櫃連鋅盤、一個洗面盆連櫃、一個鏡櫃
• 一部雪櫃、一部洗衣機、一部微波爐
• 三部分體式冷氣機
• 其他立立什什，譬如窗簾路軌……

Ｂ）水泥

• 廚房批盪、地磚、牆瓦
• 廁所批盪、地磚、牆磚
• 廁所防水、企缸
• 廳房地磚、地腳線
• 大門、廚房、廁所級咀

Ｃ）油漆

• 廳房天花、牆身起底、批灰、防潮、油漆

Ｄ）水電

• 電掣、燈掣、電話線掣、電視掣、網線掣，新做 / 改位
• 安裝座廁、潔具（鋅盤、洗面盆、龍頭）
• 更換廚廁來水銅喉、去水膠喉，連閘掣

Ｅ）木工

• 房門連框兩套，手掃油噴漆轉色 或 換新
• 廚房門連框兩套，手掃油噴漆轉色 或 換新，可能普通推開單扇門（廚房好迫） 或 雙頁左右趟門（但要改電箱，好似好麻煩，要用無火煮食） 或 三頁巴士門（唔靚，要用無火煮食）
• 廁所門連框一套，手掃油噴漆轉色 或 換新

Ｆ）木工 / 傢俬


懶得自己去揀 Items：

• 廚房地櫃，枱面料自己去買
• 廚房吊櫃
• 廁所地櫃
• 廁所鏡櫃

可做可唔做 Items：

• 走廊天花櫃，Optional

可以自己出去買 / 訂做 Items：

• 書房儲物高櫃
• 書枱
• 飯廳儲物 + Display 高櫃
• 近玄關鞋櫃
• 客廳電視櫃
• 走廊什物櫃
• 睡房衣櫃
• 4 x 6 呎床

Ｇ）其他

• 安裝客飯廳用兩匹分體式冷氣機一部，連換喉
• 安裝房用一匹或匹半窗口式冷氣機共兩部
• 拆 / 裝分體式冷氣機用戶外棚架
• 廚廁鋁片六吋闊假天花連各兩盞 LED 燈
• 安裝廚房用抽氣扇、抽油煙機各一部
• 安裝廁所用抽氣扇或浴室寶一部
• 廁所鋁質強化玻璃浴屏

Ｈ）保險

• 勞工保
• 第三保

♡ 無無聊聊自己畫則 ♡

畫份圖先～不過，有啲位畫錯咗，又有啲位度漏咗，但都可以做個 Reference 去睇吓傢俬電器嘅～～

♡ 裝修前 ♡

裝修前做返個 Record 先～

玄關位

廳 - 飯廳唔記得影

細房 - 會用嚟做書房

細房嘅另一面

睡房門後唔知點用嘅凹位

睡房 - 古怪封法

睡房 - 要掉嘅衣櫃

睡房 - 窗台

睡房同廚房中間嘅什物櫃位

廚房 

廚房 - 俾道門遮住嘅星盤

廚房對出工作平台

廁所

廁所