今日睇完進度，又做吓 Record 先～
水喉谷磅
因為唔想嘥無謂錢，但又怕有問題，我哋搵裝修師傅報價嘅時候，特別叫咗師傅幫我哋全屋嘅水喉谷一次磅睇吓有冇漏水，有漏水先至換水喉，冇漏梗係唔換啦～
話說尋晚（22/5）專登問咗師傅幾時谷磅但佢又冇覆我哋，咪以為佢下星期先做囉，點知今朝（23/5）男友返緊工打電話嚟話師傅今日朝早谷磅，嚇到我拿拿臨起身衝過去……
上到新屋，師傅 K 哥唔喺度，有三位水電師傅，兩位拉緊線，另一位就谷磅俾我睇。
其實都唔係一定要自己喺度嘅，不過自己的事自己做，裝修自己跟緊啲總係覺得好似放心啲，希望一分耕耘真係有一分收穫啦～
 |
| 谷磅嘅儀器 |
 |
| 睇讀數嘅量錶 |
Double Check 燈喉位
之前去睇埋緊嘅燈喉，有啲位置睇唔明：
1. 玄關位同走廊位做燈槽 2 way 開關，唔知點解冇由燈槽打坑去玄關（原來師傅用舊喉拉新線，ok～）
2. 廁所位睇唔到有留線出返鏡櫃燈（原來留咗自己睇唔到，ok～）
3. 櫃嘅飾燈我哋想用燈掣控制，唔係用櫃裡面嘅 on/off 掣（師傅 Confirm 咗做咗線，ok～）
4. 書房位嘅 Lan 線唔知會唔會幫我拉新線去寬頻頭位，定係直接喺書房原本個 Lan 位伸延出嚟（今日睇住師傅拉咗線去寬頻頭位，ok～）
水電師傅仲好好咁幫我哋個 Lan 位留長啲條線，話叫 K 哥遲啲打埋個骰仔頭可以直接用得～
 |
| 寬頻頭位隔離留嘅線 |
 |
| 書房新位留嘅線 |
度門同 Confirm 門
等咗陣，師傅 K 哥同做門嘅師傅一齊上到嚟，門師傅幫手度門 Size，再同 K 哥講多次我哋揀咗咩門同門框。仲有，廁所門要做百葉…… 不過俾 K 哥話我同男友老土，老土都係咁話咖啦，有抽風就一定要有位補氣咖啦（都話我哋係異類，無辦法，職業病…… o(>﹏<)o）～
 |
| 門師傅 Mark 嘅門 Size |
 |
| 師傅晏晝去落單前俾簽哋嘅草圖 |
開頭我哋去睇門嘅時候有睇鎖嘅，但返到嚟覺得個鎖好似怪怪哋（雖然幾特別 (^_^;)），第二日再去睇門鎖，個 Sales 話通常 K 哥會包埋，我哋對門鎖冇咩特別要求（如果價錢係包咗嘅話 *^O^*），嗰日咩都冇揀就走咗嘞～
點知今日 K 哥話唔包…… 唉…… 開頭佢話今日下晝會出去，會影門鎖相俾我哋揀，點知…… 又冇咗影…… (>﹏<)
睇冷氣去水點做
呢個係個 Long Story…… ⊙_⊙ 因為兩間房嘅冷氣，我同男友都已經有啲爭拗…… 好煩…… 好彩暫時好似解決咗……
好開初嘅時候，我哋想兩間房都用窗口機，因為雖然好多人都話分體靜啲，但係真係好唔想日後有咩要維修都要搵師傅出去搞，甚至要換機嘅時候要搭棚。
到度尺報價 K 哥都話冇問題，點知第一日開工 K 哥打嚟話條去水做唔到……
感覺上搞咗好耐（其實都唔係真係好耐，只係呢兩星期嘅事，但煩嘢總係覺得好似過咗成世紀咁），終於 Confirm 書房要用窗口式分體，而睡房用窗口機……
其實如果一換一，用返同種類嘅冷氣係冇咩問題嘅，但我哋新屋咩事呢？
就係因為原本房係用窗分嘅，個去水位喺室內機嘅下面，直通出外牆，再接入大廈嘅大水喉。好衰唔衰呢，我哋打算裝窗口機個位（機底）比起原本接去大廈公家喉個位低…… 大家都知啦，水向下流咖嘛，咁咪做唔到囉…… 仲要書房條公家喉係入牆嘅…… 而睡房呢，都係差唔多，不過公家喉係明喉，師傅今日就係應男友要求同佢講吓點做嘅…… 但點知 K 哥又話下晝唔得閒，唯有話我知再講返俾男友知……
Anyway，總之叫做搞掂咗，要煩嘅係去邊度買冷氣平啲抵啲可信啲，同埋要安排之前經朋友訂咗嘅兩匹機同另外兩部未訂嘅機都要星期五送貨…… 煩 SI 我……
又要約煤氣師傅上嚟嘞
K 哥同一班師傅去食晏之前提我話要約煤氣師傅，話要「塞返條喉」，老實講，上次煤氣師傅嚟睇位嘅時候我有聽但完全係冇打算明，因為煤氣師傅同裝修師傅都喺度，諗住佢哋知大家要做咩咪 OK 囉，點知，打完去 CS 呆咗……
話說，上次煤氣師傅嚟，報咗個價係千幾蚊，但打上去 CS 覆話係二千幾……
咁我問佢即係做啲咩啦，CS 個姨姨剩係照字讀，話咩「延長煤氣喉」同「磨平煤氣喉」同「裝煤氣爐」，完全聽唔明，我問佢咁係咪即係因為我哋要轉煮食爐個位置而要做咖，但 CS 姨姨又答唔到…… @_@ 請佢搵煤氣師傅打返俾我……
同時，即刻搵 K 哥求救，K 哥話，總之係「甩兩個位同加一個位」咁就啱嘞，咦，咁我又明啦喎，即係甩一個原本嘅煮食爐舊煤氣位，甩一個煤氣乾衣舊煤氣位，同加一個新煮食爐位吖嘛～
煤氣師傅覆返我，咁我又可以好放心個價錢係真係 K 哥講嘅「甩兩個位同加一個位」嘞。
再打返去煤氣公司預約咗星期四上嚟做嘢，不過要記得開定票俾低 K 哥先。
師傅開始封坑
落樓飲咗杯嘢，見太大雨又漏咗把遮喺新屋，上返去等管理處啲師傅嚟，見到水電師傅開始撈水泥封返啲坑。
 |
| 成個廳都係水泥 |
 |
| 玩水泥 |
管理處再 Check 座頭電話
上次管理處師傅嚟完話會大廈換線，點知過咗兩日個座頭電話直頭係打幾次都唔一定打得到，都仲係有卡卡聲，今日再叫管理處嚟。
點知，管理處啲師傅話部機冇事，就算有要換都要俾錢，兼且啲卡卡聲係因為大廈線路問題干擾，唔換線係解決唔到。
裝修真係好煩，煩到個人 EQ 好低忟咗，唔換啦，由得佢壞！座頭打唔到上嚟先至再算！
會唔會太衝動？
終於，叫做等到男友收工上到嚟，睇多陣我哋就走咗嘞～
